Senatori republikan, Rand Paul do të jetë në garën për President të Shteteve të Bashkuara të Amerikës në zgjedhjet e 2016-ës.
Lajmi konfirmohet përmes faqes zyrtare të senatorit të Kentakit. Pikërisht nga Kentaki pritet që Paul të shpallë edhe formalisht ambicien e tij.
“Do të garoj për president për t’i rikthyer vendit tonë parimet e lirisë dhe pushtetin e kufizuar të qeverisjes”, është thënë në postimin e publikuar në faqen zyrtare të Rand Paul.
Por përpara sfidës me kandidatin demokrat në 2016-ës, Paul duhet të mposhtë rivalitetin brenda llojit dhe nëse del fitues nga ky rivalitet atëherë do të jetë kandidati zyrtar i republikanëve që do të përballet me kandidatin demokrat për t’i zënë vendin Obamas.
Paul, 52-vjeç dhe një ish-kirurg okulistik, është emri i dytë i dalë nga radhët e republikanëve që njofton zyrtarisht ambicien për të marrë Shtëpinë e Bardhë. I pari që njoftoi kandidaturën ishte Ted Cruz, senator i Teksasit.