Kryeministri serb Aleksandar Vuçiq do të udhëtojë për vizitë zyrtare në Shtetet e Bashkuara të Amerikës nga fundi i majit ose fillimi i qershorit, porse data e saktë e vizitës ende nuk është vendosur, shkruan gazeta “Danas”, duke iu referuar burimeve qeveritare.
“Novosti” i sotëm shkruan se Vuçiq për vizitë zyrtare në Uashington do të udhëtojë nga mesi i majit.
Gazeta cek se është e sigurt se Vuçiq gjatë qëndrimit në SHBA do të bisedojë me kongresmenë të rëndësishëm, ndërsa në ambasadën amerikane në Beograd s’kanë ditur të tregojnë se a do të jetë ky rast që kryeministri serb të takojë edhe presidentin e SHBA-ve Barack Obama.
Ftesën e nënkryetarit amerikan Joseph Biden, Vuçiqit dje ia dorëzoi ambasadori në Beograd Michael Kirby, gjatë një takimi ku është folur për marrëdhëniet bilaterale, njoftoi Qeveria serbe./Tanjug/