Miratimi i një propozimi të Drejtorisë së Shëndetësisë për lejimin e mjeteve për trajtimin mjekësor të këshilltarit të KTAP-së, Cemil Luma, ka shtyrë kryetarin e Komunës së Prizrenit, Ramadan Muja, që të kërkojë rishqyrtimin e një vendimi të Kuvendit të Komunës, në saje të të cilit i ofrohet mbështetja financiare për shërim të zgjedhurve të pushtetit lokal.
Shefi i ekzekutivit komunal ka konsideruar se përkrahja materiale duhet t’u ofrohet këshilltarëve në rastet e sëmundjeve të rënda malinje dhe jo për të gjitha diagnozat.
“Ofrimi i mbështetjes financiare për çdo sëmundje nuk po më duket bash në rregull”, ka thënë Muja, gjatë mbledhjes së fundit të qeverisë lokale.
Ai ka konsideruar se në këtë mënyrë të gjithë këshilltarët mund të paraqesin kërkesë për ndihmë për çfarëdo diagnoze që marrin. Po ashtu ka propozuar që çdo kërkesë për ndihmë të ketë 3 nënshkrime nga mjekët kosovarë se operacioni nuk mund të kryhet në Kosovë dhe se duhet trajtimi jashtë vendit. /Koha Ditore/