Ministrja e Kulturës, Mirela Kumbaro, pas homazheve për Met Begën, aktori i famshëm që ndërroi jetë ditën e martë, tha se vendi ka humbur një monument të humorit.
“Met Bega i dha shpresë dhe arsye për të buzëqeshur publikut në një kohë që ishte e vështirë ta bëje këtë”, u shpreh ministrja.
“Është një humbje e madhe për skenën shqiptare”, shtoi Kumbaro.
Met Bega vuante prej vitesh nga sëmundja e Parkinsonit dhe i kishte munguar skenës vendase prej disa vitesh, që nga shfaqja e tij e fundit në “Met Bega Show“.
Në karrierën e tij të gjatë 40-vjeçare, Met Bega ka luajtur një sërë rolesh në Estradën e Tiranës, por edhe në filma artistikë me personazhe që kanë mbetur në kujtesën kolektive si “Dy herë mat“, “Tela për violinë“, “Stolat në park“ apo “Edhe ashtu, edhe kështu“./TCH/