Analistët ekonomikë dhe përfaqësuesit e bizneseve kërkojnë nga Qeveria e Kosovës që të vazhdohet me masa të spastrimeve dhe të largimit të të dyshuarve e të korruptuarve edhe nëpër ministritë dhe institucionet e tjera si në atë të Infrastrukturës, që e bëri ditë më parë ministri Lutfi Zharku. Analistët dhe bizneset janë pajtuar me vlerësimin se në organet e prokurimit nuk duhen që të jenë njerëz të korruptuar, si në rastin e OSHP-së, ashtu si ka thënë ditë më parë ambasadorja amerikane, Tracey Annn Jacobson.
Ndërkaq, mbetet mister se pas Ministrisë së Infrastrukturës a do të vazhdohet me këto spastrime edhe nëpër ministritë dhe institucionet e tjera. Për këtë çështje, ndonëse i janë bërë pyetje nuk është prononcuar zëdhënësi i Qeverisë, Arban Abrashi. Në një konferencë të kësaj jave me Odën Ekonomike Amerikane dhe bizneset, ambasadorja amerikane tha se Qeveria duhet të përmirësojë efikasitetin e prokurimit dhe të mos i mbajë në pozita vendimmarrëse zyrtarët që kanë padi për korrupsion/kosova sot/