Skulpturat e akullit, si karakteristikë e tri edicioneve të para, këtë vit vijnë me një koncept krejtësisht tjetër.
“Fillon me 20 mijë kube të akullta, me 20 mijë rrëfime të qytetarëve mbi kalldërmin e Prizrenit. Është një projekt krejtësisht bashkëkohor dhe promovon trashëgiminë kulturore, këtë pasuri që e kemi. Performanca do të shndërrohet në diçka shumë interaktive, ku me shkrirjen e 20 mijë kubeve të akullta, vizitorët do të fillojnë t’i shfletojnë dhe t’i lexojnë përjetimet e personave, që kanë shkruar mbi kalldërm”, tha Leotrim Fishekçiu, drejtor i “SculpFest”.
“SculpFest” ka mbledhur në këtë ekspozitë të përbashkët, e cila do të hapet më 2 Maj, artistë të ndryshëm ndërkombëtarë të artit bashkëkohor. Kurator i kësaj ekspozite, që do të vendoset 3 kate nën dhè, është Klod Dedja.
“Janë ftuar disa artistë ndërkombëtarë, të cilët patëm fatin t’i kemi të pranishëm me punë tejet specifike, ku thelbi i punëve të tyre është kontradita njerëzore, një dramacitet personal, e cila në një shkallë të gjëre, siç është Prizreni, merr një kontekst totalisht tjetër”, tha Klod Dedja, kurator.
Edicioni i katërt i “SculpFest” do të zgjasë nga 2 deri më 3 Maj. /KultPlus.com/