Ende mbetet e paqartë se kur Kuvendi i Kosovës do t’i fusë në rend dite amendamentet të cilat i hapin rrugë transformimit të FSK-së në FAK, pavarësisht se ato janë proceduar nga Qeveria. Anëtarë të Komisionit për Punë të Brendshme dhe Siguri dhe Mbikëqyrjen e Forcave të Sigurisë së Kosovës thonë se as që e kanë marrë materialin e Qeverisë rreth transformimit të FSK në FAK, derisa nuk përjashtojnë mundësinë që për këtë çështje të bëhet kompromis me krijimin e Asociacionit të Komunave me shumicë serbe.
Anëtari i Komisionit nga LDK-ja, Nuredin Ibushi, ka thënë se ende nuk kanë marrë materialin dhe, sipas tij, ka rrezik që kjo çështje të kushtëzohet nga Lista Serbe në këmbim të asociacionit.
“Serbët do të kërkojnë shumë koncesione sa i përket votës për FAK-un sikurse brenda strukturës së FAK-ut, por edhe në procese tjera, sikurse me Asociacionin e Komunave me Shumicë Serbe. Ata dinë këto situata t’i menaxhojnë mjaft mirë sepse janë të dirigjuar nga Beogradi”, ka thënë Ibishi./Zëri/