Ka pesë vite që në Gjonaj të Hasit, ka filluar ndërtimi i objektit të ri shkollor. Kryetari i fshatit Haziz Hodaj thotë se ky objekt shkollor ende nuk është kryer edhe pse ka filluar para pesë vitesh.
“Kjo shkollë na ka ” zgjat veshët” dhe ende s’po kryhet. Moti ka filluar që në vitin 2010”, thotë Hodaj për Kosova Sot.
“Siç duket ajo duke u ndërtuar ka filluar të vjetrohet”, shprehet ai.
Ndërkaq, drejtori i Drejtorisë së Arsimit në Prizren Nexhat Çoçaj, thotë se objekti i shkollës në Gjonaj të Hasit do të përfundon këtë vit.
“Ajo shkollë është shkollë moderne dhe do të përfundojë në këtë vit. Është financim i Komunës dhe këtë vit kemi ndarë nga rishikimi i buxhetit edhe 92 mijë euro, prandaj së shpejti besoj, se do të kryhet ai objekt madhor”, thotë Çoçaj