Deputeti i Parlamentit të Kosovës, Zafir Berisha, ka hedhur akuza të forta në drejtim të politikanëve që janë në pushtet. Ai, në blogun e tij në Facebook, i ka quajtur garniturë kriminale dhe të korruptuar, si dhe me këta Berisha thekson se nuk mund të formohet Ushtria e Kosovës.
“Formimi i ushtrisë nuk duhet kuptuar në formën e lëshimeve tjera që kjo qeveri i bënë Serbisë, ku shtetin gjithnjë e më shumë janë duke e bërë jofunksional dhe i cili nuk garanton stabilitet as për veti e aq më pak për rajonin”, ka shkruar Berisha.
“Ushtria e Kosovës nuk behet me tryeza e deklarata, por behet me ngritjen e buxhet 300% dhe me ngritjen e kapaciteteve profesionale, si dhe me armatim modern e cila mund të garojë me ushtritë ne rajon dhe vetëm kështu mund të garanton sovranitetin e vendit dhe mund të prodhon paqe në rajon dhe më gjerë”.
“Ndryshe kjo garniturë kriminale e korruptuar nuk bën ushtri, sepse janë futur në ujëra të turbullta duke dëmtuar imazhin dhe perspektivën e vendit. Emri i ushtrisë për mendimin tim ka pak rëndësi, sa kanë rëndësi gjërat qe i ceka me lartë, ndryshe nëse këta banditë institucional ngulin këmbë në emër atëherë dihet se këta kanë plan ta bëjnë kompromisin e radhës me Serbi në dëm të Kosovës, sepse dihet mirë se pa votat e “listës sërbska” nuk kalon, për aq sa ka kaluar ligji për Festat Zyrtare i cila ka mbetur në sirtarët e Kuvendit duke u pluhurosur”, ka shkruar Berisha.