Kuvendari i PDK-së Naser Berisha, kërkon që të publikohen emrat e personave që janë punësuar në pozitën e sekretareshës në shkollat e Prizrenit. Ai thotë se nëse Drejtoria e Arsimit nuk publikon emrat e sekretareshave që janë punësuar kohët e fundit nëpër shkollat e Prizrenit, atëherë një gjë të tillë do të bëjë personalisht në Kuvend.
“Unë kërkoj nga drejtori i Arsimit në Prizren, që të bëjë publikimin e emerave të sekretareshave, që janë punësuar nëpër shkolla dhe njëkohësisht të tregojë motivimin pse i kanë pranuar ato në punë”, thotë Berisha.
Sipas tij, nëse drejtori i Arsimit në Prizren, Nexhat Çoçaj, nuk e bënë një gjë të tillë, “atëherë personalisht unë do t’i publikojë në seancën e radhës në Kuvend”.
“Nuk kam frikë nga askush, por as të tjerët të mos ken frikë nga unë”.
Ndërkaq, drejtori i Arsimit, Nexhat Çoçaj thotë se sekretareshat nëpër shkolla nuk janë punësuar nga drejtoria që e drejton.
“Sekretarët e shkollave nuk janë pranuar nga Drejtoria e Arsimit. Siç e dini ekziston një paqartësi ligjore se kush ka të drejtë të zgjedhë sekretarët e shkollave dhe me këtë çështje është duke u marrë Ministria e Arsimit”, thotë Çoçaj./PrizrenPress.com/