Pa u bërë ende muaji nga sulmet e tmerrshme terroriste që goditën Parisin, duke lënë të vdekur 130 veta, U2 të dielën mbrëma është rikthyer në kryeqytetin francez me një performansë të fuqishme dhe pa fije frike.
Surpriza e mbrëmjes nuk ishin The Eagles of Death Metal, siç kishin spekuluar mediat, por ishte Patti Smith ajo që u ngjit në skenë gjatë këngës së fundit të mbrëmjes të rockerëve irlandezë. Ata kënduan së bashku “Gloria”.
Bono ngjalli emocione të mëdha kur thirri “Vive La France” teksa doli para turmës në koncertin e mbajtur në AccorHotels Arena.
“Nëse e doni lirinë, Parisi është vendlindja juaj”.
“Dhimbja është si një plagë që kurrë nuk mbyllet plotësisht. Ende e ndjej, për vete. Nëna më la kur isha 14 vjeç, por më la si një artist, e kjo plagë më shërbeu për hapjen e një bote tjetër – ku gjeta këta shokë të muzikës, këta miq të bendit. Rock n’Roll më ka shpëtuar, këta njerëz më kanë shpëtuar, ju më keni shpëtuar”.
“Ne nuk mund t’ju shpëtojmë juve, por roli ynë sonte është që t’ju shërbejmë. Kemi privilegjin të jemi shërbëtorët tuaj sonte”, tha Bono.
Pastaj, ia mori këngës “Hold Me Close”, të cilën ia dedikoi nënës së tij.
Më tutje, U2 vazhduan me hitet e tyre – “Where The Streets Have No Name”, “Beautiful Day”, “With or Without You”, “Bloody Sunday.”
Ata, po ashtu, nderuan viktimat e Parisit, duke performuar “In the Name of Love”, teksa secili nga emrat e të vrarëve më 13 nëntor u shfaqën në ekranin e madh. /Politiko.net
Pamje nga koncerti i U2 në Paris, kur emrat e të gjitha viktimave u shfaqën në ekranin e madh.
Video: U2 dhe Patti Smith, së bashku, mbrëmë në Paris