Nënkryetari i Kuvendit nga radhët e PDK’së, Xhavit Haliti, ka deklaruar se Kryesia e Kuvendit të Kosovës është e gatshme që kurdo të thërrasë seancë të jashtëzakonshme për zgjedhjen e Presidentit kurdo, mirëpo nuk e di se kur do të zgjedhet Presidenti.
Në një prononcim për RTK, sidoqoftë, Haliti ka thënë se partia e tij nuk e ka asnjë problem.
“Si PDK, jemi gati dhe nuk e kemi atë problem, as me nënshkrime dhe as me procedura”.
“Problem është më shumë dëshira dhe vullneti që të ketë një konsensus për ta zgjedhur Presidentin e vendit, të jenë të paktën të gjithë deputetët në sallë, pa përjashtim, të Opozitës dhe të Pozitës”.
“Besoj se do të kemi kuorum, sipas raportimeve që janë bërë në Grupin Parlamentar dhe në organet e partisë. Unë kësaj i besoj. Nuk besoj se do të ketë mungesë kuorumi në seancë”, ka thënë Haliti për RTK.