Situata e sigurisë u vlerësua si e qetë dhe stabile në gjithë territorin e Komunës së Rahovecit. Kështu u tha sot në mbledhjen e dytë të Këshillit Komunal për Siguri në Bashkësi (KKSB).
Për sigurinë në territorin e Komunës së Rahovecit, elaboroi zv. komandanti i Stacionit të Policisë në Rahovec, Bekim Vuçitërna. Ai thotë se raporti përfshin periudhën dy mujore, ku situata e sigurisë paraqitet e qetë dhe stabile, e krahasuar me periudhën e njëjtë të vitit paraprak.
“Nuk kemi pasur ndonjë ngjarje e cila do të destabilizonte situatën e përgjithshme të sigurisë”, ka thënë Vuçitërna.
“Sa i përket prishjes së rendit publik, janë paraqitur gjithsej gjashtë raste të lehta, ngritje e lehtë kemi kur është në pyetje kriminaliteti, kemi rënie tek vepra penale dhe rritje në zbulueshmërinë e rasteve, krahasuar me vitin paraprak”.
“Situata e sigurisë në komunikacion është e kënaqshme, ku nuk kemi incidente trafiku me fatalitet, ndërkaq edhe nëpër shkolla situata e sigurisë është e mirë, ku jemi vazhdimisht duke mbajtur ligjërata nxënësve për siguri të përgjithshme”.
Për siguri të përgjithshme nëpër shkolla, ka folur drejtoresha e Drejtorisë për Arsim, Vjollca Vuçitërna, e cila situatën e sigurisë e vlerësoi stabile dhe të qetë në përgjithësi. Për situatën e qetë dhe stabile drejtoresha Vuçitërna falënderoi Stacionin Policisë në Rahovec, të cilit me ligjërata të shpeshta ndikojnë shumë tek nxënësit, kur janë në pyetje dukuritë negative dhe devijuese në shoqëri. /PrizrenPress.com/