Federata Botërore e Futbollit – FIFA sot do ta marrë vendimin për pranimin ose jo të Kosovës në shtëpinë e futbollit botëror
Për t`u pranuar në këtë organizatë Kosovës i nevojiten së paku 105 vota nga gjithsej 209.
Nënkryetari i Federatës së Futbollit të Kosovës, Agim Ademi, ka thënë mbrëmë në Ora e Fundit të Klan Kosovës se shpreson që Kosova do i siguroj të 105 votat e mjaftueshme për anëtarësim në FIFA dhe nësë pranimi ndodh ai ka treguar grupin kualifikues për kampionat botëror.
“Shpresojmë shumë që Kosova do sigurojë 105 votat e mjaftueshme dhe do jetë anëtarja e 210 e FIFA-s. Duhet të jemi të rezervuar, por shpresojmë që ai votim të kalojë mirë pasi jemi të pranuar në një konfederatë.”
Ai njëherit ka bërë me dije se Kryetari i Federatës së Futbollit të Kosovës do të merr pjesë në Kongresin e 66-të të organizatës botërore të futbollit.
“Fadil Vokrri do të udhëtoj pasi është edhe shtetas francez, ne të tjerët jo pasi që Meksika nuk e njeh Kosovën. Menjëherë pas pranimit do jemi me grupin e Turqisë, Ukrainën, Finlandën dhe Kroacinë për kualifikime të kampionatit botëror. Nëse pranohemi ndeshja e parë do jetë me Finlandën si mysafire, kurse si vendas e kemi me Kroacinë,” ka thënë Ademi,
Dhjetë ditë më parë, vendi ynë u bë pjesë e Federatës Evropiane të Futbollit.