Kuvendi i Kosovës në vazhdimësi është përcjellë me probleme e skandale të shumta, por veçmas legjislatura e tashme po tregohet tërë- sisht e padenjë për ta përfaqësuar popullin. Një pjese të deputetëve të kësaj legjislature duket se nuk u intereson fare mirëqenia e qytetarëve, por vetëm interesat e tyre dhe favoret që mund të përfitojnë e ngritja në pozita të ndryshme. Analistët në këtë drejtim kanë thënë se kësisoj Kuvendi është bërë burim i shkaktimit të pakënaqësive të mëdha tek qytetarët dhe njëkohësisht edhe urrejtjes së publikut ndaj deputetëve të shitur dhe të shantazhuar, të cilët kanë harruar krejtësisht interesin qytetar, dhe janë vënë në shërbim të klikës kriminale që udhëheqin partitë kryesore në pushtet dhe Kosovën.
Analisti Shefqet Dibrani, në një prononcim për gazetën “Kosova Sot”, ka thënë se si duket dhe duke u bazuar në ato që shihen çdo ditë, Kuvendi i Kosovës është shndërruar në institucion zyrtar, ku rrjedhin dhe prodhohen të gjitha pakënaqësitë e qytetareve, teksa kjo, sipas tij, po shihet nga seancat e diskutimeve dhe siç tha “po merret vesh niveli se deputetët vuajnë për mungesë të theksuar morali, madje fyerjet e dallkaukëllaku në mes vete ua ka qitur të palarat, sidomos kur flasin në emër të popullit. Por, asnjëherë nuk është shtruar pyetja nëse deputetët me votat e kontrabanduara mund të flasin në emër të popullit, pasi merret vesh se ata janë të kontrabanduar për të zbatuar urdhrat e shefave të tyre”.
Skandalet nuk i skuqin pushtetarët Dibrani më tej shton se tashmë pas publikimit të dokumentarëve, “vjedhje në kohë lufte” dhe publikimit të përgjimit të bisedave telefonike të krerëve të shtetit nuk e di se ku e gjejnë atë moral për të folur në emër të popullit, derisa nuk dihet as fakti se përse nuk po vepron Prokurori i Shtetit dhe Prokuroria Speciale e Kosovës, qoftë për t’i prangosur protagonistët. Kjo Prokurori do të duhej të merrej seriozisht me sajuesit dhe publikuesit e informacione të tilla, pasi, siç tha, dihet se dy të vërteta kundërthënëse nuk mund të përkojnë për një çështje kaq esenciale për të cilën flitet shumë. ” Nëse shikojmë në retrospektivë dhe i analizojmë disa zhvillime politike, ngjarjet në vendin tonë duken të kurdisura dhe të shpifura nga vetë aparati shtetëror, i cili sikur mëton për ta tërhequr vëmendjen e qytetarëve tek skandalet e kurdisura sesa tek problemet e mëdha sociale, që tashmë nuk do të kenë zgjidhje të përshpejtuar. Po të shikojmë se si u organizua emigrimi masiv dhe po të shikohet tani sjellja dhe fodullëku i zyrtarëve shtetërorë, konkluzioni do të dalë i dhembshëm dhe rishtues”.
Më tej, Dibrani nënvizon se një skenar i ngjashëm ka qenë edhe me ngjarjet në universitet, e deri tek çështja e Asociacionit dhe Demarkacionit, derisa siç tha “jemi dëshmitarë të kësaj kohe se këto ngjarje nuk e tronditën as lëkundën ndërgjegjen e kësaj Qeverie, e cila e udhëheq vendin me duar të ndyta, sepse të sulmohet Parlamenti me mortaja dore, dhe të mos gjenden fajtorët në një Kosovë sa një grusht vend, lihet përshtypja se janë skenarë të përgatitur nga strukturat e shtetit dhe të Qeverisë për ta orientuar në probleme sekondare vëmendjen e popullsisë. Kësisoj, Parlamenti i Kosovës udhëhiqet nga njeriu më i apostrofuar për luftën e nëntokës që ka pasur Kosova, gjersa hiç më i mirë nuk është as morali i kryeministrit dhe i presidentit, prandaj siç e kemi Parlamentin e kemi edhe shtetin, i cili është kapur nga grupet mafioze, veprimet e të cilëve janë mbi ligjin dhe mbi Kushtetutën e Kosovës”. Dibrani tha tutje se Kuvendi i Kosovës është shndërruar në një fabrikë që prodhon urrejtje dhe klasifikon tradhtarë, të cilët duhet të gjenden vetëm tek opozita dhe tek disa deputetë që nuk po shiten kollaj.