Prokuroria Themelore në Prizren, ka ftuar për intervistim drejtorin e ri të Arsimit në Prizren, Zehadin Shemsedinin. Ai brenda kësaj jave është i detyruar të paraqitet në prokurori.
“Prokuroria Themelore e Prizrenit ka dërguar ftesën Zehadin Shemsedinit për intervistim dhe pritet që brenda kësaj jave ai të paraqitet në prokurori”, tregon burimi i Kohës Ditore.
Drejtori i Arsimit në Prizren, Zehadin Shemsedini është duke u hetuar për keqpërdorim të detyrës zyrtare për kohën sa ka qenë Ushtrues i Detyrës në Universitetin e Prizrenit. Ai dyshohet se kundërligjshëm ka angazhuar djalin e tij, si asistent në këtë universitet.
Angazhimi i djalit të tij, ka ndodhur në vitin 2014.
Inspektorati i Arsimit në Prizren (SIA), rastin e ka lajmëruar në organet e drejtësisë.
Kryeprokurori i Prokurorisë Themelore në Prizren, Sylë Hoxhaj, ndërkaq nuk ka pranuar të flasë rreth kësaj çështjeje. Ai as nuk e ka mohuar, por as pohuar se janë duke u zhvilluar hetimet ndaj Shemsedinit.
“Kur ka diçka të re ju informojmë sic kemi bërë deri më tash për rastet e tjera”, ka thënë shkurt Hoxha për “PrizrenPress”.
Në mars të vitit 2014-të në UPZ është pranuar djali i ish-Ushtruesit të Detyrës së Rektorit, Zehadin Shemsedini, pa i përmbushur kriteret profesionale. /PrizrenPress.com/