Presidenti i Kosovës, Hashim Thaçi, ka shkruar në llogarinë e tij në Facebook se është i lumtur kur e sheh flamurin shqiptar të valëvitet në më shumë toka se kurrë më parë, njofton Klan Kosova.
“Flamuri kuqezi ka qenë gjithmonë në zemrat tona si burim i pashtershëm frymëzimi. Më bën të lumtur dhe krenar kur sot e shoh që valëvitet i lirë dhe në më shumë toka se kurdo herë më parë”.
Thaçi, për këtë 28 nëntor, ka rikujtuar dëshmorët dhe martirët e kombit duke thënë se për ta më shumë duhet të ndjejmë krenari se dhimbje.
“Sot, krenaria është më e madhe se dhimbja për heronjtë tanë, për dëshmorët e martirët”.
“Për Skënderbeun, për Ismail Qemalin e Isa Boletinin, për Bajram Currin e Themistokli Gërmenjin, për Hasan Prishtinën e Marigo Posio, për Shaban Polluzhën e Adem Jasharin, për UÇK-në dhe çdo ushtar të saj, për ata që dhanë jetën për liri dhe ata që e gëzojnë së bashku me ne këtë liri”.
“Ata janë frymëzimi ynë për të punuar çdo ditë që të ndërtojmë shtete të fuqishme, që brezat që do të vijnë të jetojnë në liri e barazi, dinjitet e prosperitet”.