Afër pikës kufitare në Vermicë patrulla policore ka ndaluar shtetasin B.M., të cilit i janë gjetur 10 kg substancë narkotike të llojit marihuanë. I njëjti ka tentuar që policëve t’u japë mito 100 euro.
Policia Kufitare e Kosovës në afërsi të pikës kufitare të Vërmicës mbrëmë rreth mesnatës gjatë patrullimit ka vërejtur një person të dyshuar afër rrethojës së autostradës dhe në afërsi një veturë të ndaluar me targa gjermane.
Sipas një komunikate të Policisë, patrulla policore gjatë kontrollit të personit, të veturës dhe hapësirës përreth gjen një çantë me 20 qese substancë narkotike që dyshohet të jetë e llojit marihuanë.
Pastaj, patrulla kufitare njofton Njësinë e Antidrogës të DRP Prizren, e cila vazhdon me procedura të rastit.
Sasia e substancës narkotike e gjetur është: 10.068 kg.
Gjatë marrjes në pyetje, i dyshuari tenton t’u ofrojë 100 euro mito zyrtarëve policorë.
Policia njofton prokurorin kujdestar të Prokurorisë së Prizrenit për rastin e gjetjes së substancës narkotike dhe për ofrimin e mitos dhe me urdhër të tij i dyshuari B.M., lindur më 1987, shtetas i Kosovës, dërgohet në ndalim policor për 48 orë.
Po ashtu, policia sekuestron si provë materiale: substancën narkotike (10 kg e 068 g.), veturën e të dyshuarit dhe dy kartëmonedha nga 50 euro.