Gjuetia e jashtëligjshme në zonat malore që shtrihen në rajonin e Prizrenit gjatë muajve të fundit ka sfiduar institucionet përgjegjëse rreth përpjekjeve për ruajtjen e faunës së egër.
Kësaj situate, sipas autoriteteve kompetente pos gjuetisë pa leje, i ka kontribuar edhe degradimi i habitateve natyrore, sidomos pyjeve, kushtet e pavolitshme klimatike dhe menaxhimi joefikas i faunës së egër, shkruan sot “Koha Ditore”.
Si pasojë Ministria e Bujqësisë, Pylltarisë dhe Zhvillimit Rural pak javë më parë pati marrë vendimin që nga 26 dhjetori 2016 të mbyllet sezoni i gjuetisë për periudhën 2016 – 2017.
Megjithëkëtë gjuetia pa leje në këtë zonë nuk është ndalur. Policia rajonale e Prizrenit ka raportuar se javën e kaluar pas vrasjes së dy derrave të egër në territorin e Suharekës ka sekuestruar një pushkë gjysmautomatike nga një i dyshuar, i cili do të kallëzohet në prokurori për veprat penale të gjuetisë së kundërligjshme dhe armëmbajtjes pa leje.