Të enjten ishte paraparë të fillonte gjykimi ndaj të akuzuarit për veprën penale “vjedhje” , M. D. Mirëpo, mungesa e vet të akuzuarit u bë shkak i shtyrjes së shqyrtimit fillestar, nga gjykatësja e Gjykatës Themelore në Pejë, Shpresa Emra.
Për të akuzuarin i cili nuk kishte avokat mbrojtës, u konstatua se gjykata ka prova se është ftuar në mënyrë të rregullt, por i njëjti nuk e ka arsyetuar mungesën e tij.
Ndryshe, prezent në këtë seancë ishte prokurori Fatos Ajvazi, si dhe i dëmtuari O. M.
Gjykatësja Emra tha se ndaj të akuzuarit, do të lëshohet urdhër për sjellje me dhunë.
I dyshuari po akuzohet se me 21 shtator 2014, në fshatin Nashec të Komunës së Prizrenit, me qëllim të përvetësimit të kundërligjshëm, merr telefonin e të dëmtuarit O. M.
Këtë e bën në atë mënyrë që deri sa ishin në një shoqëri së bashku me shokë të tjerë, i’a merr telefonin e markës “iPhone3” në shërbim, por të njëjtin nuk i’a kthen.
Ndryshe, vepra penale “vjedhje” e përcaktuar në nenin 325, paragrafi 1, të Kodit të ri Penal të Republikës së Kosovës, dënohet me gjobë ose me burgim deri në tre vite.