Kreu i Nismës për Kosovën, Fatmir Limaj, nuk ka asnjë dilemë se koalicioni PDK-AAK-Nisma do të jetë fitues i zgjedhjeve të 11 qershorit, por që dilema e tij është se a do të mundin të gjithë ata që kanë dhënë premtime të mbajnë fjalën.
Sipas tij, për këtë do të jetë Nisma në qeverisje për t’i bërë të gjithë ata që kanë premtuar ta mbajnë fjalën.
Limaj në një bashkëbisedim me qytetarë dhe me struktura të Nismës në Suharekë, ka folur lidhur me rolin që ka kjo parti në koalicionin me PDK-në dhe AAK-në, ku sipas Limajt ata do të jenë aty për të mbajtur të gjithë përgjegjës për atë që e kanë premtuar.
“Nuk ka asnjë dilemë se ky koalicion i madh do t’i fitojë zgjedhjet. Pra, unë se kam atë gajle. Unë e kam një gajle tjetër çka do të bëjë ky koalicion mos do t’i rritet mendja, arroganca dhe e han vetën sikur ata të tjerët përpara. Kur merret besimi i qytetarëve atëherë ke një përgjegjësi të madhe, nuk është vetëm privilegj. Siç e thash nuk kam asnjë dilemë në rezultatin e këtij koalicioni, dilemat e mija janë a do të mundemi të gjithë të jemi të gatshëm, sidomos ata që po flasin ta mbajnë fjalën. Për këtë duhet të jetë Nisma fuqishëm në Qeveri dhe në parlament. Ne jemi aty për të premtuar se me Nismën ndryshe nuk mundesh me qeverisë përveç se me mbajt fjalën për atë që ke dhënë”, ka thënë Limaj.