Shtëpia botuese “Fidani” në Prizren, këto ditë botoi dy tituj të ri të autorit Osman Goranci: “Gruaja e drejtorit” dhe “Muaji i mjaltit”. Të dy këto komedi të gazetarit e dramaturgut Osman Goranci janë lujatur në skenë.
Drama, në kuadrin e së cilës komedia është lloji me i vështirë i krijimtarisë, në dramaturgjinë shqipe të Kosovës, edhe pse ka fond të dukshëm krijimesh, ende le shumë për t’u dëshiruar, sidomos në cilësi, sepse, edhe sot e gjithë ditën, mungojnë veprat që do të mund të konsideroheshin vlera të mirëfillta artistike thotë në recensionin e tij për komedinë “Gruaja e drejtorit” Skender Zogaj.
Sipas Zogajt në këtë situatë çdo vepër e re paraqet kënaqësi, sepse, shkon në të mirën e zgjerimit të mundësive për pasurimin dhe ngritjen e cilësisë artistike! Në këtë drejtim përpjekje, që meriton të konsiderohet sukses, sjellë autori Osman Goranci, me komedinë “ Gruaja e drejtorit”, e cila, si tekst po e sheh dritën e botimit, e ka kaluar “ylberin”, duke dhënë provimin me sukses, në skenën e Teatrit të Prizrenit, që me këtë shfaqje ka joshur shikuesit dhe kritikën teatrore, që e kanë mirëpritur shfaqjen.
Të “Gruaja e drejtorit” kemi të bëjmë me familjen tipike fshatarake, që papritur i bie të përballet me qytetërimin, krejt e papërgatitur për ta mbajtur drejtpeshimin e jetës, në rrethanat e reja. Autori Goranci, tesktit të vet i paraprinë me mendimin aforistik të Demostenit: “Asgjë s’është më e lehtë se gënjimi i vetvetes. Cdo njeri ëndërron se ajo është e vërteta e tij”.
Në fund të recensionit të tij Skender Zogaj shpreh bindjen e tij të thellë se, botimi i komedisë “Gruaja e drejtorit” është krejtësisht i merituar dhe më dobi të shumëfishtë, sepse, përhapja e këtij lloji të botimeve, kapërcen interesin personal të autorëve, duke qenë se, sa më shumë që të kemi tekste dramaturgjike, është krejtësisht e arsyeshme të shpresojmë se, do të ketë edhe nxitje për shfrytëzimin e këtij lloji të teksteve, shumë të nevojshme për skenat teatrore, të cilat kurrë nuk do të mund të realizojnë funksionin e të mirëfilltë artistik, nëse u mungojnë krijimet e autorëve tanë.
Për komedinë e dytë “Muaji i mjaltit recensenti Emin Z. Emini thotë se është realizuar kryesisht duke gërshtuar komedinë e situatës me komedinë e konversacionit, ani pse mund të konstatohet lehtë se ajo përmban edhe shumë elemente të komedisë së karakterit. Është strukturar në tri pamje dhe ka tetë personazhe. Vendi i zhvillimit është recepcioni i një hoteli bregdetar. Duke qenë se personazhet vazhdimisht ndodhen në situata të papritura skenike, të cilat ndonjëherë vijnë si pasojë e keqkuptimit të tyre, ndonjëherë edhe të qëllimtë, gjatë zhvillimit të veprimit, atyre iu duhet të ballafaqohen me rrethanën si pasojë.
Sipas Eminit komedia “Muaji i mjaltit” e Osman Gorancit shënon një vlerë të çmuar në lëvrimin e letërsisë dramatike, në zhanrin më të vështirë të saj, komedinë. Është lehtësisht e inskenueshme për çdo teatër dhe si e tillë, pse jo, është një “lugë mjaltë” në pelinin e jetës bashkëkohore./Gazetaere.com/