Të gjitha rrugët kryesore në fshatrat e Komunës së Malishevës janë të hapura nga bora, por në viset malore, përkatësisht në fshatrat që shtrihen përgjatë Maleve të Berishës, ka pasur vështirësi në qarkullim, pasi erërat e kanë zhvendosur borën në disa vende, duke krijuar trashësi të borës deri në tri metra, si në Berishë e në Bardh. Pas shumë përpjekjeve, në fshatin Bardh, është liruar rruga për lagjet e Berishëve dhe Goden.
Të gjitha fshatrat që shtrihen në Malet e Berishës, si Tërpezë, Fshat i Ri, Berishë, Lladrovc, Senik e Bardh, sot janë vizituar nga nënkryetari i Komunës së Malishevës, Hajdin Berisha, i cili së bashku me ekipet komunale, kanë inspektuar punën e kompanisë së kontraktuar për mirëmbajtjen e rrugëve, si dhe u janë përgjigjur thirrjeve të banorëve të këtyre fshatrave, në vendet ku ka pasur nevojë të intervenohet për largimin e borës.
Në Berishë, trashësia e borës në disa vende arrinte lartësinë rreth tre metra, sidomos në rrugën që lidhet me fshatin Kleçkë, ku është bërë hapja e rrugës, ndërsa edhe në fshatin Bardh, sidomos në lagjen e Berishëve, është hapur rruga deri në brendi të lagjes, pasi nga mbrëmë ka qenë e bllokuar nga bora.
“Ne do të jemi në shërbim të banorëve 24 orë në ditë dhe do ti përgjigjemi të gjitha kërkesave të banorëve, për hapjen e rrugëve”, tha nënkryetari Berisha, gjatë hapjes së rrugëve në këto fshatra.