Ministri i Punëve të Brendshme, Bejtush Gashi, ka pritur në takim kryetarin e Komunës së Suharekës, Bali Muharremaj, ku thuhet të jetë diskutuar lidhur me çështjen e sigurisë në këtë komunë, e cila vlerësohet si një ndër komunat më të qeta sa i përket sigurisë.
Muharremaj ka kërkuar nga Gashi që të rritet numri i zjarrfikësve, sepse “numri aktual është shumë i vogël për një komunë me rreth 90 mijë banorë”.
Ai tha se Komuna është e gatshme që të ndajë një parcelë për ndërtimin e objektit, mirëpo kërkohet nga qeveria Qendrore, respektivisht MPB, që të ndihmojë ndërtimin e objektit.
Ministri Gashi theksoi se fillimisht MPB është duke punuar për të zgjidhur statusit e zjarrfikësve në të gjithë Kosovën, pastaj gradualisht edhe plotësimin e kushteve të punës për këto njësi në të gjitha komunat. Ai tha se do të bëhen përpjekje për t’i dalë në ndihmë kësaj komune, pasi të shikohen mundësitë për investimet kapitale për vitin 2019.
Që të dy bashkëbiseduesit u pajtuan se është shumë e rëndësishme që të ketë bashkëpunim të ngushtë në mes të nivelit lokal dhe atij qendror, në mënyrë që qytetarët e vendit të ndjehen të sigurt dhe tu ofrohen shërbime sa më efikase.