Kuvendarja e Lëvizjes Vetëvendosje! në Prizren, Mimoza Bushrani, ka akuzuar partnerin e koalicionit, Nismën, për tradhti.
Ajo, ka shkuar aq larg sa që i ka quajtur “kopilë të politikës ditore”.
Shpërthimi i saj, ka ardhur pas publikimit të emrave të rinj të drejtorëve të shkollave .
“Kosova është e vogël. Komuna e Prizrenit edhe më e vogël, dhe nuk ka se si të mos kuptohet se për të qenë pjesë e Komisionit për përzgjedhjen e drejtorëve dhe zëvendësdrejtorëve, persona të caktuar “kushtëzohen” që ta ndërrojnë subjektin politik. Me t’u përmbushur kjo “kërkesë” e NISMA-s, procesi i allishverishit për formimin e këtij komision nuk zgjat më shumë se tri ditë”, tha Bushrani, shkruan “PrizrenPress”.
Drejtoria e Arsimit në Prizren, e cila udhëhiqet nga Nisma, ka publikuar sot emrat e drejtorëve të rinjë të shkollave.
Ata nuk janë mirëpritur, as nga vetë përfaqësuesit e Vetëvendosjes, që bashkëqeverisin me Nismën dhe LDK-në.
“Është tepër zhgënjyese që NISMA nuk iu përmbajt parimeve të cilat i kishte negociuar gjatë kohës së formimit të koalicionit qeverisës në Prizren”, tha Bushrani.
“Lista e kandidatëve të propozuar për drejtorë dhe zëvendësdrejtorë është larg asaj që e kanë pritur shumica e qytetarëve të Komunës sonë”.
“Jo vetëm kandidatët që kanë të drejtë për ankesa dhe parashtesa, por këtë të drejtë e gëzon çdo qytetar i Komunës së Prizrenit, ata të cilët e duan një arsim apolitik”.
“Drejtoria e Arsimit në Prizren, që udhëhiqet nga NISMA, ia ka huq qëllimshëm me anëtarët e këtij komisioni e më pas edhe më listën e kandidatëve të propozuar”
“DKA paraprakisht rekrutoi anëtarë të rinj, kryesisht nga PDK-ja dhe rezultati përfundimtar për shumicën e qytetarëve të Prizrenit po del të jetë tepër zhgënjyes”.
“ Asnjë gur i lëvizur për ndryshimin e arsimit, ndryshim i cili po pritet me interesim nga shumica e qytetarëve”.
“Personat që ndërruan subjektin politik për një interes personal, e kanë vetëm një emër, ata janë kopilë të politikës ditore, e më kopilë të tillë asnjë proces nuk shtyhet përpara”.
“Çfarë të presim më tepër kur një “JO” e Nismës, brenda natës bëhet “Po”? “/PrizrenPress.com/