Punimet rreth meremetimit të objektit të shkollës fillore “Bajram Curri ” në Krushë të Madhe po i afrohen fundit. Drejtoresha e DKA-së Mr. Besa Hoxha-Beqiri i ka vlerësuar punimet që janë duke u bërë janë cilësore dhe ka shtuar se objektit po i bëhet një ndërhyrje serioze, duke u ndërruar dritaret, dyert dhe ndërhyrje të tjera në gjithë hapësirën shkollore.
“Ndërrimi i dritareve dhe dyerve, fasadimi i objektit nga jashtë dhe brenda ishte shumë i nevojshëm, pasi që gjendja e shkollës ishte jashtëzakonisht e rëndë. Jemi të kënaqur me investimin, ndërsa presim që ky investim të ketë edhe efektin e vet në përmirësimin e kushteve për nxënësit e kësaj shkolle. Ndonëse punimet do të zgjasin edhe pak, megjithatë është më mirë që rregullimet të bëhen sa më cilësore”, tha ajo.
Edhe drejtori i shkollës Fadil Dellova tha se kemi hasur në gatishmërinë e kryetarit komunës Smajl Latifi që të bëhet edhe rregullimi i terrenit sportiv në mjediset e shkollës. Me këto investime po kryhet një ndërhyrje serioze në tërë hapësirën shkollore dhe urojmë që punimet të përfundojnë sa më parë, pasi që po humben ditë mësimi.
Kryetari i komunës Smajl Latifi, gjatë vizitës që i bëri kësaj shkolle kërkoi që punimet të përshpejtohen, pa e dëmtuar cilësinë. Po ashtu kërkoi që drejtoria e shkollës të gjejë mundësi për shfrytëzimin e hapësirave të shkollës së mesme “Ukshin Hoti”, në mënyrë që humbjet e orëve të mësimit të minimizohen. Krejt angazhimi ynë ka të bëjë me përmirësimin e kushteve të punës dhe të mësimnxënies në shkollat e komunës së Rahovecit, shtoi ndër të tjera kryetari Latifi.
Punimet në shkollën “Bajram Curri ” po i kryen kompania ,,Rafii”, ndërsa pritet që shumë shpejt të përmbyllen me sukses. Meremetimi i shkollës financohet Komisioni Evropian, ndërsa pritet që pas kësaj rreth 950 nxënës të shkollës të mësojnë në kushte dukshëm më të mira. /PrizrenPress.com./