Ish-kandidati i PDK-së për kryetar të Prizrenit, Shaqir Totaj, ka kritikuar qeverisjen lokale të Mytaher Haskukës.
Sipas tij, ndryshimi i premtuar në këtë qytet, nuk po ndodhë.
“Profili i kryetarit aktual të Prizrenit z. Haskuka aspak nuk është kompatibil me profilin dhe kualitetet e një lideri ashtu si e kërkon posti i të parit të Prizrenit”, tha Totaj, transmeton “PrizrenPress”.
Shaqir Totaj, në zgjedhjet e kaluar lokale, ka humbur balotazhin për pak vota me kandidatin e VV-së, Mytaher Haskuka.
”Kur këtij konstatimi i shtohet edhe filozofia politike dhe veprimet jo konstruktive të VV-së dhe krejt kjo në kombinim me koalicionet e panatyrshme bëhet akoma më e vështirë – nëse jo e pamundur që të ofrohet ndryshimi, i cili u është premtuar qytetarëve të Prizrenit”.
“Trendët e deritanishme të qeverisjes lokale në Prizren ofrojnë materialë të mjaftueshëm për të argumentuar këtë konstatim”./PrizrenPress.com/