Ehat Oreshka, Drejtor për Kulturë Rini e Sport në komunën e Prizrenit, është i dënuar për dy vepra penale, saktësisht për falsifikim të dokumenteve dhe legalizim të përmbajtjes së rreme.

Megjithatë, Orsheka vazhdon të punojë në pozitën e Drejtorit të Kulturës, raporton KTV.

Kohavisioni ka provuar ta marrë një përgjigje për këtë çështje nga drejtori i kulturës Ehat Oreshka, por ai nuk ka qenë i qasshëm gjatë ditës.

Naim Cahani nga KDI-ja, ka thënë se raste të tilla i japin imazh të keq Prizrenit dhe qeverisjes aktuale, andaj kryetari Haskuka duhet të reflektojë dhe ta shkarkojë atë nga pozita.

E, kryetari i kësaj komune, Mytaher Haskuka, ndonëse thotë se nuk është në dijeni për këtë, veprat e drejtorit të kulturës i minimizon krahasuar me, sipas tij, shkeljet e ndryshme që bëjnë qeveritarët.

Ndërkaq, zëdhënësja e Gjykatës Themelore të Prizrenit, Afërdita Kicaj, përmes telefonit, i ka thënë Kohavision-it se Oreshka veprat penale i ka kryer në vitin 2013.

Në vitin 2017, sipas saj, është ngritur aktakuza për të, ndërsa në këtë vit i është shqiptuar masa prej 1 vit e 6 muaj dënim me kusht, derisa palët kanë të drejtë ankese në Gjykatë të Apelit.