Gjykata Themelore në Gjakovë, dega në Rahovec, ka shqiptuar gjashtë muaj burgim me kusht ndaj të akuzuarit për veprën penale “vjedhje e rëndë”, Burrim Hundozi.
Ndërsa, ka shpallur aktgjykim lirues për dy të akuzuarit tjerë, Haxhi Haxhimistafa dhe Vadet Ondozi.
Aktgjykimi është shpallur nga gjykatësi, Ilir Rashkaj, pasi që i akuzuari Hundozi paraprakisht e ka pranuar fajësinë për akuzën me të cilën ngarkohet, raporton “Betimi për Drejtësi”.
Dënimi me kusht nuk do të ekzekutohet nëse në periudhën gjashtë mujore pasi që aktgjykimi të merr formën e prerë, i akuzuari Burrim Hundozi ia kompenson dëmin të dëmtuarit Skender Hundozi.
Gjykatësi Rashkaj, po ashtu i njoftoi palët prezente se kundër këtij aktgjykimi kanë të drejtë ankese në afat prej 15 ditësh, nga dita e pranimit të aktgjykimit me shkrim.
Ndryshe, në aktakuzën e Prokurorisë Themelore Gjakovë të ngritur më 10 qershor 2013, të pandehurit akuzohen për veprën penale vjedhje e rëndë në bashkëkryerje.
Sipas aktakuzës, të akuzuarit më 19 prill 2012, në bashkëkryerje me qëllim që vetit t’i sjellin përfitime pasurore të kundërligjshme, janë marr vesh ndërmjet vete dhe i kanë ndarë rolet, me ç’rast me forcë kanë hyrë në lokalin “Randevu”, pronë e të dëmtuarit Skender Hundozi nga Rahoveci.
Në aktakuzë thuhet se vjedhja ka ndodhur në atë mënyrë që Haxhi Haxhimustafa e ka hapur me forcë dritaren e lokalit, nëpërmjet saj kanë depërtuar brenda dhe kanë vjedhur aparatin e cigareve dhe një portofol me tre euro para të gatshme, e kanë bartur dhe dërguar në vendin e quajtur “Fusha e Tubës” dhe pastaj e kanë hapur me forcë dhe nga i njëjti kanë vjedhur 10 euro apoena metalike dhe 40 pako cigare të llojeve “Marlboro”, “Kent”, “Vinston”, të cilat i kanë ndarë në katër pjesë të barabarta dhe janë larguar në drejtim të panjohur.//Betimipërdrejtësi