Kryetari i Rahovecit, Smajl Latifi, ka thënë se Komuna nuk ishte në dijeni për veprimet e ish-zyrtarit, Nysret Shala, i cili u arrestuar për “Marrje Ryshfeti”.
Kryetari i Komunës së Rahovecit, Smajl Latifi, në një intervistë për lajmi.net ka folur për ish-shefin e Drejtorisë së Bujqësisë në këtë komunë, Nysret Shala, i cili u arrestua nën akuza për “Marrje Ryshfeti”, se bashku me ish-zëvendësministrin Musa Cena, që vinte nga po kjo parti.
Latifi ka thënë se për çështjen në fjalë është informuar nga mediat, ndërsa ka deklaruar se Shala i është ndërprerë marrëdhënia e punës.
“Siç e kam cekur në të kaluarën, unë jam informuar vetëm nga mediat për rastin në fjalë. Ky rast i përket sektorit të drejtësisë dhe drejtësia e ka dhënë fjalën, andaj nuk më takon që të komentoj në rastet që i përkasin organeve të drejtësisë, sa për informatë z. Nysret Shala i është ndërprerë marrëdhënia e punë”, ka thënë Latifi.