Këshilli i drejtorëve në Komunën e Malishevës, nën drejtimin e kryetarit të komunës, Ragip Begaj, ka mbajtur mbledhjen e rregullt, në të cilën drejtorët e drejtorive kanë raportuar për aktivitetet e javës së kaluar si dhe për planifikimet për këtë javë.
Në mesin e shumë çështjeve që janë diskutuar, është njoftuar edhe për përgatitjet për shënimin e 17 shkurtit, ditës së shtetësisë së Kosovës.
Sipas Drejtorisë për Kulturë, Rini dhe Sport, janë duke u bërë të gjitha përgatitjet për shënimin e 17 shkurtit, ditës së shtetësisë së Republikës së Kosovës, ku janë paraparë të zhvillohen një varg aktivitetesh kulturore dhe sportive si dhe, në bashkëpunim me sektorë të tjerë, edhe aktivitete të tjera tradicionale.
Krahas mbledhjes solemne të Kuvendit të Komunës, do të bëhen edhe homazhe dhe nderime në varrezat e dëshmorëve në Malishevë dhe Kleçkë, pastaj në Prekaz, ndërsa gjatë ditës do të mbahet edhe një koncert në parkun e qytetit.
Këtyre aktiviteteve do t’u paraprijnë edhe aktivitete të tjera sportive.