I akuzuari për veprën penale “vjedhje”, A. L. është deklaruar i pafajshëm, në shqyrtimin gjyqësor të mbajtur të hënën, në Gjykatën Themelore në Gjakovë, dega në Malishevë.
Pasi që aktakuza është konsideruar e lexuar me pëlqimin e të akuzuarit, ka thënë se nuk e pranon fajësinë.
“Unë edhe më herët jam deklaruar i pafajshëm, e po ashtu edhe sot deklarohem se unë nuk e kam kryer këtë vepër penale”, ka thënë i akuzuari .
Ai, gjithashtu ka kërkuar nga gjykata, që në seancë të ftohen J.U. , që sipas tij, nga ky person e kishte blerë telefonin, si dhe të dëmtuarin V. .
Lidhur me këto propozime të të akuzuarit, prokurorja Deshirë Jusaj, ka deklaruar se nuk ka ndonjë kundërshtim.
Me vendim të gjykatësit, Njazi Morina, janë aprovuar propozimet e të akuzuarit , dhe seanca e radhës është caktuar të mbahet më 24 prill 2019, në ora 10:00, ku me ftesë të rregullt do të ftohet J. U., kurse me detyrim do të ftohet i dëmtuari V.
Në bazë të aktakuzës së Prokurorisë Themelore në Gjakovë, të ngritur më 25 shtator 2014, A.L., po akuzohet se më 26 nëntor 2013, rreth orës 16:00, në fshatin Carallukë, Komuna e Malishevës, përkatësisht në dyqanin “Gryka Market”, në mënyrë të kundërligjshme i merr pasurinë të dëmtuarit Valmir Hoti, duke kryer veprën penale të vjedhjes nga neni 325, paragraf 1, të KPRK-së.
Sipas aktakuzës, i akuzuari , duke shfrytëzuar mos prezencën e të dëmtuarit në dyqan, i merr telefonin e tipit “Samsung Galaxy S3”, i cili në atë moment ka qenë mbi arkë të dyqanit dhe më pas i akuzuari largohet në drejtim të pa njohur.
Në aktakuzë thuhet se telefoni është sekuestruar dhe i është kthyer të dëmtuarit. /Betimipërdrejtësi