Inspektori i ndërtimtarisë në Komunën e Prizrenit, Enver Bytyqi, është deklaruar i pafajshëm për keqpërodrim të pozitës apo autoritetit zyrtar.
Në seancën fillestare të mbajtur të enjten në Gjykatën Themelore në Prizren, pas leximit të aktakuzës nga prokurori Mehdi Sefa, i akuzuari Bytyqi ka thënë se nuk e ndien veten fajtor për akuzën me të cilën ngarkohet, duke shtuar se ai nuk e ka kryer këtë vepër penale, raporton “Betimi për Drejtësi”.
Ndërsa, fajësinë e ka pranuar i akuzuari për veprën penale të heqjes apo dëmtimit të vulave zyrtare apo shenjave, Feim Hamiti, i cili ka thënë se pendohet për veprën që ka kryer.
Prokurori Mehdi Sefa, nuk e ka kundërshtuar pranimin e fajësisë nga i akuzuari Hamiti, duke shtuar se ka prova të mjaftueshme për vërtetimin e fajësisë, dhe ka kërkuar nga gjykata që në rast të aprovimit të fajësisë gjatë shqiptimit të dënimit, t’i ketë parasysh si rrethanat rënduese, ashtu edhe ato lehtësuese.
Kurse, mbrojtësi i të akuzuarit Feim Hamiti, avokati Skender Morina, ka kërkuar nga gjykata që të aprovojë pranimin e fajësisë dhe gjatë shqiptimit të dënimit t’i ketë parasysh rrethanat lehtësuese, se i akuzuari është mbajtës i familjes dhe se për herë të parë ka rënë ndesh me ligjin.
Pas dëgjimit të palëve, gjykatësja Raima Elezi, e ka aprovuar pranimin e fajësisë nga i akuzuari Hamiti, ndërsa shpalljen e aktgjykimit e ka caktuar më 17 maj 2019, në ora 10:00.
Ndërsa, për të akuzuarin e parë Enver Bytyqi, pasi që ai nuk e ka pranuar fajësinë, gjykatësja Elezi, seancën e shqyrtimit të dytë e ka caktuar më 20 qershor 2019, në ora 09:00.
Ndryshe, në aktakuzën e Prokurorisë Themelore Prizren të ngritur më 19 prill 2019, i pandehuri Enver Bytyqi akuzohet për veprën penale të keqpërdorimit të pozitës apo autoritetit zyrtar, ndërsa i pandehuri Feim Hamiti, akuzohet veprën penale “heqja apo dëmtimi i vulave zyrtare ose shenjave”.
Sipas aktakuzës, i akuzuari Bytyqi, gjatë periudhës kohore 2016-2017, në Prizren, në cilësinë e personit zyrtar nuk i përmbush detyrat zyrtare, ashtu që shkel Ligjin për Ndërtimtari, duke mos rrënuar objektin ndërtimor në lagjen “Jeimahall”, të investitorit NTSH “Shigjeta e Pashtrikut” me pronar Feim Hamiti, me qëllim që të përfitimit të dobisë për tjetrin.
Në aktakuzë thuhet se i akuzuari vetëm ka kryer punë administrative në hartimin e procesverbalit duke mos sjell konkluzionin për rrënimin e objektit pa leje, kështu ka mundësuar dobi pasurore për investitorin Feim Hamiti.
Në dispozitivin e dytë të aktakuzës, thuhet se i akuzuari Hamiti, gjatë vitit 2017, pas vendosjes së shiritave nga inspektorët komunalë, i njëjti nuk e përfill vërejtjen për ndalimin e punimeve dhe heq shiriti e vendosur duke dëmtuar vulat zyrtare dhe vazhdon ndërtimin e objektit pa leje. /Betimipërdrejtësi