Në praninë e kryetarit të Komunës, Mytaher Haskuka, drejtoreshës së Drejtorisë Komunale të Arsimit, Xhemile Thaçi Vezgishi, familjarëve të heroit Remzi Ademaj, si dhe nxënësve e mësimdhënësve të shumtë nga shkollat e ndryshme të komunës, u bë hapja e manifestimit tradicional “Java Remzi Ademaj – Shtigjeve të Lirisë”.
Ky manifestim, i cili organizohet çdo vit nga ana e Komunës së Prizrenit, ka për qëllim që me anë të aktiviteteve të ndryshme edukative, sportive dhe kulturore, të nxit konkurrencën mes nxënësve dhe njëkohësisht e nderon veprimtarin e dalluar në çështjen kombëtare, heroin Remzi Ademaj.
Në kuadër të këtij manifestimi, sivjet do të marrin pjesë mbi 1200 nxënës nga rreth 40 shkolla të ndryshme të komunës së Prizrenit, të cilët do të garojnë në 9 diciplina të ndryshme.
“Java Remzi Ademaj – Shtigjeve të Lirisë” do të zgjasë deri më 23 shtator, ndërsa deri atëherë do të ketë gara në këndim, recitim, valle, kuize me shkrim në histori, ping-pong, futboll, volejboll, basketboll dhe atletikë.
Me rastin e hapjes së edicionit të sivjetëm, u bënë edhe homazhe pranë shtatores dhe lapidarit të Remzi Ademajt – Komandant Petritit.