Drejtoresha e Arsimit në Prizren, Xhemile Thaçi-Vezgishi, ka pezulluar konkursin e fundit për mësimdhënës.
Sipas saj, vendimi është marrë pas vendimit të Gjykatës Themelore në Prizren.
“Kandidatët të cilët kanë aplikuar në konkursin e datës 04.11.2019, njoftohen se sipas vendimit të gjykatës pezullohet deri në një vendim tjetër të gjykatës”, thuhet në njoftim, shkruan “PrizrenPress”.
Konkursi i Komunës së Prizrenit për mësimdhënësit, që ishte shpallur më 4 nëntor të këtij viti, është pezulluar nga Gjykata Themelore e Prizrenit.
Kjo gjykatë ka caktuar masën e përkohshme të sigurimit për këtë konkurs në bazë të propozimit të kandidatëve që janë përzgjedhur si më të suksesshëm në konkursin e ngjashëm të zhvilluar gjatë verës së këtij viti.
“Gjykata Themelore e Prizrenit ka aprovuar si të bazuar propozimin e propozuesve Arta Begaj-Thaqi, Ardita Dilji, etj. të cilat i përfaqëson avokati Muhamet Shala, ku caktohet masa e përkohshme e sigurimit me të cilën i urdhërohet të paditurës Drejtorisë Komunale të Arsimit në Prizren, ashtu që pezullohet konkursi me nr.01-111-154376 i datës 04.11.2019, shpallur nga Zyra e Personelit të Komunës së Prizrenit deri në shterjen e mjeteve administrative apo deri në një vendim tjetër të gjykatës”, thuhet në vendimin e Gjykatës Themelore në Prizren.
Gjykata ka obliguar propozuesin që në afat prej 30-ditësh të ngrejë padi dhe ta njoftojë gjykatën për këtë./PrizrenPress.com/
Linku
https://kk.rks-gov.net/prizren/wp-content/uploads/sites/26/2019/12/Njoftim.pdf