Lulzim Kabashi, kandidat i koalicionit AAK-LDD për kryetar të Prizrenit është takuar me banorë të fshatrave Planejë, Gorozhup, Mazrek dhe Gjonaj të Hasit.Ai kërkoi nga ata që me 3 nëntor të votojnë Aleancën për Prizrenin.“Qeverisja e koalicionit AAK-LDD, do të jetë shembull dhe model i mirëqeverisjes lokale dhe të pa korruptuar”
Gjatë këtyre takimeve të cilat i zhvilloi në secilin nga këta fshatra veç e veç, Kabashi theksoi rëndësinë se pse duhet të votohet ai për kryetar, dhe pse të votohet koalicioni AAK-LDD për të qeverisur me komunën e Prizrenit.
“ Qytetarët janë lodhur nga keqqeverisjet e kaluara, dhe tani është momenti që në Prizren të bëhen ndryshime, e ndryshimet do të vijnë vetëm me ardhjen në pushtet të koalicionit AAK-LDD, si alternativë e vetme për të sjellë perspektivë për të rinjtë e komunës së Prizrenit, duke ju krijuar kushte të favorshme që kontributin e tyre të japin në vendin tonë”
“Gjatë katër vjeçarit të ardhshëm të qeverisjes së koalicionit AAK-LDD, para qytetarëve të komunës së Prizrenit, do të sjellim mirëqeverisje duke qenë në shërbim të qytetarëve e jo qytetarët në shërbim të komunës, si ka ndodhë deri më tash”
Kabashi, duke kërkuar votën e banorëve të fshatrave Planejë, Gorozhup, Mazrek dhe Gjonaj, premtoi se kanalizimet, uji, institucionet shkollore, ambulantat dhe çdo kërkesë tjetër e qytetarëve të kësaj ane, do të rregullohen gjatë mandatit të ardhshëm katër vjeçar, sepse këto janë kërkesa të mundshme për t’u realizuar.
Banorët e këtyre fshatrave shprehën gatishmërinë e tyre që të përkrahin kandidatin e koalicionit AAK-LDD për kryetar të Prizrenit, sepse siç thanë ata, Prizreni vërtetë ka nevojë për ndryshime, dhe zhvillim ekonomik./PrizrenPress.com/