Komuna e Suharekës është në pritje të rezultateteve për mostrat e 24 banorëve të saj, të cilët janë testuar sot. Rezultatet e tyre pritet që të publikohen në mbrëmje, raporton Express.
Kryetari i Suharekës, Bali Muharremaj ka thënë për Express se sot do të ritestohen nëntë persona për të parë nëse janë shëruar.
Sipas tij, Suhareka aktualisht ka 31 raste aktive me COVID-19.
“Gjendja është e mirë në Suharekë. Sot po i presim rezultatet për 24 mostra. Gjendja e të infektuarve është stabile. Sot do të ritestohen nëntë persona për të parë nëse janë shëruar. Aktualisht, në Suharekë i kemi 31 raste aktive. Të konfirmuara gjithsej kanë qenë 36 raste, një ka ndërruar jetë dhe pesë janë shëruar. Po besoj që këta nëntë që do të testohen të dalin negativë dhe të bie numri”, ka thënë Muharremaj për Express.
Ndryshe, mbrëmë janë konfirmuar shtatë raste të reja me COVID-19. Rastet pozitive janë raste kontakti nga Komuna e Prizrenit, VitiA dhe Mitrovica e Jugut.
IKSHP’ja ka njoftuar edhe për shërimin e 22 pacientëve.
“Sot më 30 prill 2020, janë shëruar edhe njëzet e dy (22) pacientë, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej dyqind e shtatëdhjetë e një (271) raste”, thuhet në njoftim.
Që nga shpërthimi i pandemisë, në Kosovë kanë vdekur 22 pacientë. Numri i përgjithshëm i të infektuarve ka arritur në 806, ndërsa 271 pacientë janë shëruar./Gazeta Express