Qeveria e Kosovës ka ndryshuar strategji kur bëhet fjalë për asociacionin e komunave me shumicë serbe në veri. Ky organ që do të themelohet në bazë të Marrëveshjes së Brukselit mes Kosovës dhe Serbisë të arritur më 19 prill, është vlerësuar si një ndër pikat më kontestuese të dokumentit. Njëkohësisht në Prishtinë ishte zhvilluar debat i madh për formatin e tij e veçmas për emërtimin që do t’i jepej komunave veriore.
Beogradi insistonte që krijesën e re ta quante “bashkësi”, ndërsa Prishtinë “asociacion”. Madje për t’i shuar këto polemika, kanë filluar të përdoren të dyja përnjëherë por që në esencë kanë dallime të mëdha. Termi Bashkësi/Asociacion është përdorur në Ligjin për vetëqeverisje lokale i cili në parim ka kaluar para disa muajsh në Kuvend,shkruan Tribuna.
Por tash kur Qeveria po dërgon ligje të reja që dalin nga marrëveshja po eliminon në tërësi fjalën asociacion. Kështu ka ndodhur në plotësimi-ndryshimin e Ligjit për mbrojtjen dhe promovimin e të drejtave të komuniteteve.