Situata po vjen duke u rënduar akoma më shumë sa i përket bilancit të viktimave pas tërmetit në Izmir të Turqisë.
Ka arritur në tre numri i viktimave me origjinë shqiptare nga tërmeti në Turqi, njofton Klan Kosova
Këtë lajm e ka konfirmuar ambasadori i Kosovës në Ankara, Ilir Dugolli.
Viktimat nga Kosova janë Nazmije Dograjan 64-vjeçe, Hatixhe Dogruja 70-vjeçe dhe burri i saj Bajram Dogruja 73-vjeç.
Ndërkohë që në spital në gjendje të rëndë ndodhet djali i Nazmije Dograjas, Malik Tahirleri.
Ambasada e Republikës së Kosovës në Ankara ka shprehur ngushëllime për tri viktimat të cilat bëhet e ditur se janë nga familja Do?rayan në Izmir që kanë ndërruar jetë si pasojë e tërmetit.
“Nga komunikimet e vazhdueshme, Ambasada e Republikës së Kosovës në Ankara është informuar se tre persona me origjinë nga Kosova nga familja Do?rayan në Izmir kanë ndërruar jetë si pasojë e termetit. Mund të konfirmojmë se deri më tani nuk ka të dhëna për shtetas të Republikës së Kosovës të vdekur. Ne i shprehim ngushëllimet tona familjes Do?rayan dhe të gjithë familjeve dhe të afërmve tjerë të prekur nga kjo tragjedi, dhe iu urojmë shërim të shpejtë të gjithë të lënduarve”, thuhet në postimin e ambasadës.
Ambasada e Republikës së Kosovës në Turqi ka publikuar numrat e kontaktit, ku shtetasit kosovarë mund të lajmërohen për ndihmë.
Kujtojmë se numri i përgjithshëm i personave të vdekur nga ky tërmet ka arritur në 39 teksa numri i të lënduarve në 885.
