Kryetari i Komunës së Prizrenit, Mytaher Haskuka dhe drejtori i Drejtorisë së Punës dhe Mirëqenies Sociale (DPMS), Islam Thaqi sot kanë filluar me shpërndarjen e drurëve për ngrohje për familjet e dëshmorëve, invalidëve të luftës dhe familjeve në nevojë.
Me këtë rast, kryetari Haskuka theksoi se duke marrë parasysh edhe situatën pandemike që ka ndikuar negativisht në gjendjen ekonomike të qytetarëve, Komuna e Prizrenit këtë vit ka ngritur numrin e përfituesve nga ky projekt, ku 700 familje do të furnizohen me nga 3 metra drurë nga DPMS.
Po ashtu, kryetari Haskuka deklaroi se për t’i dalë në ndihmë sadopak familjeve të dëshmorëve, invalidëve të luftës dhe familjeve në nevojë, do të vazhdojnë edhe me shpërndarjen e pakove ushqimore dhe higjienike.