Ministri në detyrë i Shëndetësisë, Armend Zemaj ka thënë se vaksinat antiCOVID pritet të arrijnë në Kosovë në muajin shkurt.
Zemaj ka shtuar se janë duke punuar intensivisht në këtë aspekt.
“Jemi duke punuar intensivisht, e mira është që kemi siguruar zinxhirin e ftohjes, dhe sigurisht që vaksinat e para pritet të arrijnë në muajin shkurt”, ka thënë Zemaj.
Zemaj ka folur edhe për tubimet partive politike dhe moszbatimin e masave antiCOVID.
“Partitë politike organizojnë takime, njerëzit duhet të kenë kujdes dhe çdo pjesëmarrje përtej numrit të caktuar bëhet objekt i dënimit. Çdo kush të ketë kujdes për vetveten të mos bëhet pjesë e shkeljes së ligjit”, shtoi Zemaj.
I pyetur nga gazetarët se a pritet të ketë ndonjë lirim të masave, Zemaj tha se nuk pritet të ndodh tani për tani
“Nuk mund të ja lejojmë vetës komoditetin që të shkojmë në lirimin e ndonjë mase të caktuar, që mund të prishte stabilitetin e rasteve dhe pandemisë”, tha Zemaj. /Telegrafi/