Visar Ymeri shprehet kundër marrjes së vendimeve jashtë institucioneve. Duke iu referuar takimit të sotëm në Ambasadën Amerikane për reformën zgjedhore, Ymeri thotë se praktikat e tilla kanë prodhuar dy presidentë jokushtetues e një presidente nga zarfi.
Liderët kryesor politik të Kosovës, në një takim të organizuar nga Ambasada Amerikane, kanë rënë dakord për shumë çështje që ndërlidhen me reformën zgjedhore, finalizimi i të cilave deri tash ka mbetur peng i mospajtimeve të tyre.
Por, në këtë takim ka munguar Kryetari i Lëvizjes Vetëvendosje, Albin Kurti, i cili nuk ka qenë i ftuar, megjithëse subjekti i tij politik përfaqësohet në Kuvendin e Kosovës me disa deputetë.
Kryetari i Grupit Parlamentar të Vetëvendosjes, Visar Ymeri, nuk ka dashur të flas për mungesën e ftesës për liderin e tij, Albin Kurti, por deklaroi për lajmi.net se praktikat e tilla të marrjes së vendimeve jashtë institucioneve është në kundërshtim me demokracinë e brendshme dhe me sovranitetin institucional.
“Ne insistojmë që Kosova të ndjekë rrugë institucionale jo vetëm të marrjes së vendimeve, por edhe të diskutimit të këtyre çështjeve”.
“Kjo mënyrë që po e shohim të shndërrohet në praktikë të diskutimit mes një numri të politikanëve jashtë hapësirave të institucioneve të Kosovës, pra as në ndërtesën e Kuvendit e as të qeverisë, shkon drejtpërdrejt në kundërshtim me sovranitetin institucional, demokracinë e transparencën, si dhe në kundërshtim edhe me demokracinë e brendshme të subjekteve politike”.
“Praktikat e tilla i kanë prodhuar dy presidentë antikushtetues dhe një presidente nga zarfi”.
“Këto po i shkaktojnë shumë dëme Kosovës”.
Ymeri thotë se Lëvizja Vetëvendosje që nga fillimi i punës së Komisionit ad-hoc për reformën zgjedhore (nga viti 2011) i ka pasur publike dhe të dorëzuara në këtë Komision qëndrimet e qarta të saj për sa i përket sistemit zgjedhor dhe çështjeve për administrimin e zgjedhjeve.
“Çështjet e përmirësimit të sistemit zgjedhor asnjëherë nuk janë penguar a bllokuar nga Lëvizja Vetëvendosje, por përkundrazi janë shtyrë nga ne”.
“Janë pikërisht subjektet politike të marrëveshjes jashtë institucionale (pra PDK’ja e LDK’ja) ato që e kanë penguar më së shumti përmirësimin e sistemit zgjedhor”.