Spekulimet mediatike të ditëve të fundit se Hashim Thaçi është në prag të pajtimit me Fatmir Limajn dhe Jakup Krasniqin, janë totalisht të pavërteta, pasi që brenda disa ditësh këta të fundit do ta zyrtarizojnë një subjekt të ri politik!
Një bashkëpunëtor i ngushtë i Limajt, ka thënë për portalin Veriu se pohimet e tilla nuk kanë të bëjnë asgjë me realitetin.
“Pohimet për kthimin e Limajt në PDK janë vetëm propagandë e disa mediave për të krijuar habi te qytetarët. Fatmir Limaj dhe Jakup Krasniqi janë në fazën përfundimtare të krijimit të një subjekti të ri politik. Ky subjekt politik do të zyrtarizohet në fund të dhjetorit ose eventualisht në fillim të janarit”, ka thënë ky burimi.
Sipas tij, ky subjekt qysh në ditët e para do të shtrihet në të gjitha qytetet të Kosovës.
“Me t’u zyrtarizuar, partia do të ketë shtrirje në të gjitha qytetet e Kosovës dhe do të përbëhet nga bashkëpunëtorë të hershëm të Limajt e Krasniqit, por edhe nga kuadro të reja”, shton burimi, i cili thekson se kësaj partie do t’i bashkëngjiten edhe disa deputetë të PDK-së të Kuvendit të Kosovës, të cilët nuk janë të kënaqur me zhvillimet e viteve të fundit në PDK.