Mërgimtarët nga fshati Mushtisht i Suharekës, ndihmojnë bashkëfshatarët e tyre, në zhvillimin e vendlindjes. Pos ndihmave të mëparshme të këtyre mërgimtarëve, sot shoqata “Mushtishti Në Diasporë” ka pajisur me shirita ndriçues, 100 nxënës parashkollorë dhe të klasave të para, duke ju ardhur atyre në ndihmë për të qarkulluar në rrugë pa probleme.
Shoqata “Mushtishti në Diasporë” me seli në Zvicër, vazhdon të ndihmojë bashkëfshatarët e saj në Mushtisht të komunës së Suharekës. Këtë herë kanë qenë fëmijët e vegjël parashkollorë dhe të klasave të para, që falë një donacioni nga kjo shoqatë, janë pajisur me shirita ndriçues, për t’ju ardhur në ndihmë, gjatë lëvizjes në rrugë, për trajnimin e të cilëve, u përkujdes Policia e Kosovës.
Drejtori i shkollës ‘Edit Durham’, Xhavit Durmishi, falënderon angazhimin e anëtarëve të kësaj shoqate, për kontributin që po japin në zhvillimin e fshatit të tyre,transmeton rtk.
Nga rreth 5 mijë banorë sa ka fshati Mushtisht i Komunës së Suharekës, 2 mijë prej tyre janë në diasporë. Shoqata “Mushtishti në Diasporë” ka 72 anëtarë dhe është themeluar në maj të këtij viti. Kjo shoqatë ka ndihmuar në ndërtimin e një morgu në Mushtisht, si dhe një automjet për bartjen e kufomave. Sipas anëtarëve të kësaj shoqate, kontributi i tyre nuk do të ndalet, deri sa ky fshat të ketë nëvojë për ta.