Bono së bashku me grupin e tij U2 kanë shkruar këngë për filma të ndryshëm, por sipas tyre, të bësh muzikë për filmin e Nelson Mandela-s ishte një përvojë e veçantë.
Bono ka pasur një miqësi të gjatë me Mandela-n, i cili vdiq më 5 dhjetor dhe tani artisti ka shkruar një këngë mjaft personale që paraqitet në filmin biografik të Mandela-s, me titull Mandela: “Long Walk To Freedom”.
“Kjo është një ndër ato gjërat që nuk mund t’i refuzosh. Edhe pse ndiheshim të stresuar, duhet ta bënim dhe ta bënim mirë. Fillimisht menduam që ata kërkonin një himn apo ndonjë këngë politike, por ata na befasuan, meqenëse ky film përpos që është një dramë e madhe historike, bëhet më interesant me faktin që është një histori e ndërlikuar e dashurisë”, ka thënë Bono sipas Deadline.
Kënga e titulluar “Ordinary Love” tashmë është lansuar dhe ka korrur sukses në treg. Sipas Bonos, titulli i këngës i atribuohet si aspektit personal, ashtu edhe atij politik dhe universal.
“Teksti është inspiruar nga letrat që Nelson i ka shkruar gruas së tij, Winnie Mandela. Gjuha e tyre është arkaike, ai ishte një gentleman i vërtetë. Për të fjalët kishin shumë rëndësi, ai i flet asaj me shumë butësi”, është shprehur Bono.