Kryetari i Komunës së Suharekës, Bali Muharremaj ka thënë se garanton me përgjegjësi të plotë në pafajësinë e dy zyrtarëve të kësaj komune të arrestuar sot nga Policia e Kosovës për keqpërdorim të pozitës zyrtare dhe mashtrim me prokurim publik.
Të dyshuarit Enver Shabani dhe Berat Kabashi akuzohen se kanë përpiluar procesverbale të rrejshme dhe konfirmim të punëve sipas kontratave e që sipas gjendjes në terren ato nuk janë kryer.
Muharremaj ka thënë se i respektojnë organet e drejtësisë, porse sipas tij të gjitha projektet e rrugëve janë realizuar sipas kontratave.
“Është duke u bërë hetimi i lëndëve për vitin 2023. Ne i respektojmë organet e Republikës së Kosovës, i respektojmë gjyqësinë dhe hetuesin. Për këta dy zyrtarë bëhet fjalë për lëndën që i përket fshatit Mushtisht”, ka thënë Muharremaj në magazinën e në RTK-së
Ai ka thënë se rrugët që janë kryer nga komuna e Suharekës të gjitha janë shtruar sipas kontratës së paraparë dhe të gjitha janë rregulluara me saktësi.
“I kuptoj të gjitha organet e shtetit, është ana ligjore, por mund të garantojë plotësisht për këta dy zyrtarë se nuk ka keqpërdorim. Mirëpo, në fund të fundit hetuesia i ka punët e veta dhe rasti është në hetim”, ka thënë Muharremaj.
Ai iu ka shmangur përgjigjes nëse do të jepte dorëheqje në rast se organet e drejtësisë konfirmojnë keqpërdorimin e pozitës zyrtare nga dy zyrtarët e dyshuar, duke këmbëngulur se të gjitha projektet janë realizuar sipas kontratave.
Reklamë
