Richard Collett, në artikullin e tij, flet edhe për jetën me plot sfida të banorëve vendës, por të cilët bëjnë të pamundurën që kultura, tradita e Kukësit të mbete edhe më tutje gjallë, ndonëse,  konfliktet e reja janë vetëm një shkëndijë larg, veçanërisht duke pasur parasysh se pavarësia e Kosovës nuk është njohur kurrë nga Serbia, që përbën një shqetësim në Ballkan.

Autori i tekstit citon mendimin e një  gazetareje kosovare, lidhur me njerëzit që kanë përjetuar luftën.

“Ata kanë kujtime të tmerrshme,” tha Remzije Sherifi, një gazetare kosovare e cila u largua nga shtëpia e saj gjatë konfliktit të vitit 1999. “Njerëzit kanë humbur familje të tëra, të tjerë kanë të dashur ende në burg ose jetojnë me shpresën e kthimeve që mund të mos ndodhin kurrë.”

Duke hapur dyert për rreth 400 mijë njerëz, Kukësi i tregoi botës se edhe në momentet më të errëta mbizotëron njerëzimi. Tani, banorët shpresojnë të ndajnë historitë e tyre të komunizmit dhe konfliktit duke përhapur gjithashtu idealet e tyre të mikpritjes dhe paqes.