Instituti Demokratik i Kosovës ka reaguar ndaj qëndrimit të opozitës për bojkotim të punimeve të seancës në Kuvendin e Komunës së Malishevës.
Kuvendi i Komunës së Malishevës edhe sot për të tretën herë dështoj në zgjedhjen e kryesuesit për shkak të bojkotit të opozitës duke shkaktuar mungesë kuorumi për mbarëvajtjen e punimeve të këtij institucion.
Neni 41 i Ligjit për Vetëqeverisje Lokale thotë se “Kuvendi i komunës e zgjedh kryesuesin e kuvendit të komunës nga radhët e anëtarëve. Kryesuesi i kuvendit të komunës zgjidhet për një mandat të njëjtë sikurse anëtarët e kuvendit, votimi në të gjitha zgjedhjet për kryesues të kuvendit të komunës është me vota të fshehta”.
“Ligji për Vetëqeverisje në asnjë rast nuk specifikon që Kryesuesi i Kuvendit të Komunës duhet të jetë domosdo edhe i subjektit politikë shumicë, andaj kërkesa e grupit parlamentarë se bojkotimi është pjesë e kërkesës për bashkëqeverisje me IQM-n nuk qëndron dhe secili subjekt politik i përfaqësuar në këtë institucion mund të kandidojë anëtarë nga radhët e veta që të jetë pjesë e garës për të kryesuar këtë institucion”, tha përfaqësuesi i KDI-së, Naim Cahanaj.
Kuvendi i Komunës së Malishevës seancën konstituive ka mbajtur 23 dhjetor dhe bazuar në neni 50.2 të Ligjin për Vetëqeverisje Lokale i cili thotë se “Kuvendi i Komunës konsiderohet jo funksionues nëse nuk e zgjedh kryesuesin, tridhjetë (30) ditë pas themelimit”, pra këtij institucioni i ka mbet që deri më 22 janar 2014 të zgjidhë domosdo kryesuesin sipas legjislacionin në fuqi.
“Mungesa e gatishmërisë së opozitës për të qenë pjesë e punimeve të seancës në zgjedhjen e Kryesuesit të Kuvendit të Komunës së Malishevës mund të qojë deri në shpalljen e Kuvendit jo funksionues nga ana e Qeverisë së Kosovës ku për pasojë do të kemi zgjedhje të reja për Kuvendin e Komunës së Malishevës”.
“Instituti Demokratik i Kosovës (KDI) i bënë thirrje të gjithë anëtarëve të Kuvendit të Komunës së Malishevës nga radhët e opozitës që të jetë pjesë e punimit të seancave dhe të mos jetë pjesë e bojkotit të punimeve. Në të kundërtën çdo lëshim apo bojkotim i seancave reflekton në jo seriozitet dhe mungesë të përfaqësimit dinjitozë të interesave të qytetarëve të Komunës së Malishevës”./PrizrenPress.com/