Avokati i Isni Kilajt, Iain Edwards, pas arrestimit të ish-kryetarit të Komunës së Malishevës nga Gjykata Speciale, ka thënë për Dukagjinin se ende nuk ka informacione të qarta mbi arsyen e arrestimit të klientit të tij, i cili u mor nga shtëpia e tij në Malishevë mëngjesin e të enjtes.
“Mësova sot në mëngjes se z. Kilaj është arrestuar në shtëpinë e tij në Malishevë dhe është marrë me vete. Më tha një anëtar i familjes së zotit Kilaj. Nuk kam dëgjuar asgjë nga Dhomat e Specializuara. Nuk e di pse është arrestuar apo ku po e çojnë. Nuk kam mundur të flas me klientin tim. Po mundohem të gjej më shumë informacion”, ka deklaruar ai për Dukagjinin.
Kilaj, ish-komandant i Ushtrisë Çlirimtare të Kosovës, është arrestuar nga Gjykata Speciale edhe më parë, më 2 nëntor 2023.
Tashmë, ai është dërguar në EULEX për t’u transferuar në Hagë.
Lajmi për arrestimin e Kilajt u konfirmua nga djali i tij, Blend Kilaj, i cili ka theksuar se nuk është informuar ende për arsyet e këtij arrestimi.
