Në kuadër të avancimit të punës profesionale dhe përmirësimit të cilësisë së shërbimeve shëndetësore, si dhe në aplikimin e metodave dhe arritjeve më të reja në mjekësi, të premten, në amfiteatrin e Qendrës Rajonale të Shëndetit Publik në Prizren, u mbajtën tri ligjërata nga lëmia e ortopedisë, psikiatrisë dhe pediatrisë.
Aktiviteti u mbajt nën udhëheqjen e Dr. Shefki Xharra, koordinator i cilësisë, ndërsa morën pjesë mjekë dhe profesionistë shëndetësorë nga të gjitha lëmitë mjekësore, përcjell PrizrenPress.
Dr. Hadi Hasanaj, ortoped, mbajti ligjëratën “Frakturat e pjesës proksimale të sëmurit te moshat e vjetra”. Në ligjëratën e tij, Dr. Hasanaj foli për rritjen e rasteve të këtyre frakturave te moshat e vjetra, si dhe mbi metodat më të avancuara kirurgjikale dhe jo kirurgjikale për trajtimin e tyre.
Dr. Fatmire Veselaj, psikiatre, mbajti ligjëratën “Dhuna në familje”. Në ligjëratën e saj, Dr. Veselaj theksoi rëndësinë e trajtimit të dhunës në familje dhe ndikimin e saj në shëndetin mendor të individëve, si dhe rolin që profesionistët shëndetësorë luajnë në identifikimin dhe mbrojtjen e viktimave të dhunës.
Dr. Idriz Braha, pediatër, mbajti ligjëratën “Menaxhimi i asthmës në moshat fëmijërore”. Në ligjëratën e tij, Dr. Braha foli për rëndësinë e diagnostifikimit të hershëm dhe menaxhimit të sëmundjes, si dhe përparimet më të fundit në trajtimin e astmës pediatrike.
Ligjëratat janë organizuar në kuadër të Edukimit të Vazhdueshëm Profesional, sipas Planit Vjetor për vitin 2025, dhe janë akredituar nga Oda e Mjekëve të Kosovës. Pjesëmarrësit, nëpërmjet interaktivitetit, parashtruan pyetje dhe shkëmbyen eksperienca mbi sfidat dhe mundësitë që ofron aplikimi i praktikave dhe metodave më të reja në mjekësi, si dhe bashkëpunimin për përmirësimin e praktikave të përditshme në ofrimin e shërbimeve shëndetësore./PrizrenPress.com
